Hyang Yesus Nunas Icayang Para Sisian Idane
17
Sasampune Hyang Yesus ngandika sekadi punika,
Ida raris nyengenget ka langite saha ngandika sapuniki,
“Duh Aji,
sane mangkin sampun rauh galahe.
Edengang kaagungan Putran Iratune puniki mangdane Putran Iratune puniki prasida ngedengang Kaagungan Iratune.
2 Iratu sampun ngicen Putran Iratune hak buat nguasain manusane makasami.
Punika mawinan Titiang prasida ngicen urip sujati salamin-laminne kapining anake sami sane sampun picayang Iratu punika.
3 Urip salamin-laminne punika sekadi puniki:
anake sami uning Iratu sane tunggal,
nenten tios Sang Hyang Pengardi sane patut,
lan uning Sang Hyang Yesus Kristusa sane utus Iratu.
4 Titiang sampun ngagungang Iratu ring jagate puniki antuk muputang pakaryan sane picayang Iratu ring Titiang.
5 Duh Aji!
Sane mangkin,
agungang ja Titiang ring ajeng Iratune antuk kaagungan sane druenang Titiang sareng Iratu sadereng jagate puniki kaciptayang.
6 “Titiang sampun ngedengang Iratu ring anake puniki.
Idumun ipun sami mabesikan sareng jagate puniki,
nanging Iratu micayang ipun ring Titiang.
Ipun nenten tios druen Iratune,
lan Iratu sampun micayang ipun kapining Titiang.
Ipun sampun ninutin pengajahan Iratune.
7 Sane mangkin ipun uning indik saluirin sane picayang Iratu kapining Titiang mawit saking Iratu.
8 Santukan sekancan pengajahan sane picayang Iratu ring Titiang sampun nikayang Titiang ring ipun sami.
Lan ipun sampun nerima pengajahane punika tur uning Titiang puniki yakti mawit saking Iratu.
Lan ipun pracaya Iratu sane ngutus Titiang.
9 “Titiang nunas icayang para sisian Titiange puniki.
Titiang nenten ja nunas ica buat jagate puniki,
nanging buat sisian Titiange sane sampun picayang Iratu kapining Titiang,
duaning ipun nenten tios druen Iratune.
10 Sekancan druen Titiange pada druen Iratune.
Lan sekancan druen Iratune pada druen Titiange.
Tur Titiang kaagungang malantaran ipun.
11 Sane mangkin Titiang jagi rauh ring Sang Hyang Aji.
Titiang nenten malih meneng ring jagate puniki,
nanging ipun kari ring jagate puniki.
Duh Aji sane maraga suci!
Piara ja ipun nganggen kuasan Iratune inggih punika kuasa sane sampun picayang Iratu kapining Titiang,
mangdane ipun dados siki pateh sekadi Iraga siki.
12 Ritatkala Titiang sareng-sareng ipun,
Titiang miara ipun nganggen kuasan Iratune inggih punika kuasa sane sampun picayang Iratu kapining Titiang.
Titiang sampun nyaga ipun tur asiki ja nenten wenten sane ical lianan kapining anake sane kapastiang jagi ical.
Indike punika manut sekadi sane sampun katulis saking Cakepan Sucine.”
13 Hyang Yesus nunas ica malih sapuniki,
“Duh Aji,
sane mangkin,
Titiang jagi mawali ring Iratu.
Nanging tatkala Titiang kari ring jagate puniki,
Titiang nikayang sekancan paindikane puniki mangda para sisian Titiange kaebekin antuk sukarenan Titiange.
14 Titiang sampun ngicen pengajahan Iratune kapining ipun,
tur anake ring jagate ngamusuhin ipun krana ipun nenten mabesikan sareng jagate puniki,
pateh sekadi Titiang nenten mabesikan sareng jagate puniki.
15 Titiang nenten ja nunas mangda Iratu ngambil ipun saking jagate puniki,
nanging mangda Iratu miara ipun saking I Jaat nenten tios ratun buta kalane.
16 Ipun nenten mabesikan sareng jagate puniki,
pateh sekadi Titiang nenten mabesikan sareng jagate puniki.
17 Suciang ja ipun mangda dados druen Iratune malantaran pengajahan indik napi sane patut.
Pengajahan Iratune wantah kapatutane punika.
18 Pateh sekadi Iratu ngutus Titiang ring jagate,
kenten pada Titiang ngutus ipun ring jagate.
19 Lan Titiang nyuciang anggan Titiange dados aturan kapining Iratu,
mangdane ipun kasuciang malantaran pengajahan indik napi sane patut.
20 “Titiang mapinunas nenten ja buat para sisiane puniki kamanten,
nanging pada buat anake akeh sane jagi pracaya kapining Titiang krana kasaksian para sisiane puniki;
21 Titiang mapinunas mangdane ipun sami dados siki,
pateh sekadi Aji masikian sareng Titiang,
lan Titiang masikian sareng Aji.
Dumogi ja ipun sami masikian sareng Iraga mangda anake ring jagate pracaya indik Aji sane ngutus Titiang.
22 Titiang sampun ngicen ipun kaagungan sane picayang Iratu kapining Titiang mangda ipun masikian,
pateh sekadi Iraga nenten tios siki:
23 Titiang masikian sareng ipun lan Iratu masikian sareng Titiang kantos ipun yakti-yakti dados siki.
Tatujone mangdane anake ring jagate puniki uning indik Iratu sane ngutus Titiang tur indik Iratu tresna asih kapining ipun,
pateh sekadi Iratu tresna asih kapining Titiang.
24 “Duh Aji,
Titiang meled mangdane anake sami sane picayang Iratu kapining Titiang meneng sareng-sareng Titiang ring dija ja Titiang meneng.
Tatujone mangdane ipun nyingakin kaagungan Titiange.
Kaagungan sane sampun picayang Iratu kapining Titiang krana welas asih kapining Titiang sadereng jagate puniki kaciptayang.
25 Duh Aji sane adil!
Anake ring jagate nenten uning ring Iratu,
nanging Titiang uning ring Iratu;
tur para anake puniki uning indik Iratu sane ngutus Titiang.
26 Titiang sampun ngortiang indik Iratu kapining anake sami puniki;
Titiang jagi setata malaksana sekadi punika.
Tatujone mangda tresna asih Iratune kapining Titiang setata ring manah ipune sami tur Titiang masikian sareng ipun sami.”